САД тврдат дека Северна Кореја со планираното лансирање на ракета „јасно и сериозно“ би ги прекршила своите обврски од резолуциите на Советот за безбедност на ОН.
Портпаролот на Белата куќа Џеј Карни денес изјави дека со лансирањето на проектилот би била доведена во прашање и американската помош во храна за осиромашената земја. САД со сојузниците ќе работат на следни чекори доколку официјален Пјонгјанг го изврши лансирањето, рече Карни.
Северна Кореја претходно соопшти дека ракетата е подготвена за лансирање и дека тоа би можело да се случи уште во четврток. Заменик-директорот на вселенската програма на земјата, Риу Гам Чол, ги отфрли обвинувањата дека наводното лансирање на сателит е само параван за тестирање на балистички проектил со нуклеарен потенцијал. Тој кажа и дека не постои опасност отпадоци од лансирањето да завршат во населени места.
Меѓународната заедница е обединета во критиките за планираното лансирање. Јапонскиот премиер Јошихико Нода и британскиот министер Дејвид Камерун, кој е во посета на Токио, денес изразија длабока загриженост. Тие ја повикаа Северна Кореја да се откаже од нуклеарната програма и балистичките проектили. Загриженост искажаа и Русија и Кина. Вашингтон и Сеул, пак, денес ја реафирмираа заложбата за одбрана на Јужна Кореја.
„Севернокорејското лансирање на проектил би било исклучиво провокативен потег, би ја загрозило регионалната безбедност и би било спротивно на неодамнешните потези за воздржување од секаков вид на лансирање на проектили од долг домет. Сметаме дека би ги прекршило Резолуциите 1718 и 1874, така што и натаму подвлекуваме дека не е добра идеја“, изјави портпаролката на Стјет департментот Викторија Нуланд.
Северна Кореја наведува дека ја лансира ракетата за да испрати метеоролошки сателит во орбитата. САД и Јужна Кореја, пак, сметаат дека се работи за тестирање на балистички проектил што би можел да се употреби за нуклеарни боеви глави.