По последните протести во Скопје, но и во над 14 градови каде живее дијаспората под мотото „Ние сме Македонија“ за како што велат, - зачувување на македонскиот идентитет и против промена на името, експерти во Вашингтон, сепак, коментираат дека двете страни имаат шанса да направат исчекор.
Таква оценка изнесе и генералниот секретар на Организацијата за безбедност и соработка во Европа - ОБСЕ, Томас Гремингер.
„Има позитивна политичка динамика во Македонија и во Грција. Можноста за решение не треба да се одложува“, изјави Гремингер.
Јануш Бугајски, експерт за Балканот во Вашингтон коментира дека шансата не треба да се испушти.
„Веројатно ова е најдобра можност за решение за името што Македонија и Грција ја имале во последните 20 години. Македонија има нова влада која има големо почитување од меѓународната заедница, а во Грција има Влада која нема толку националистички призвук“, коментира Бугајски.
Запрашан, каде гледа основа за решение, со оглед на демонстрациите против решение, и во Скопје, но и во Атина. Бугајски вели:
„Компромисот би бил да се разочараат двете екстремни страни. На пример да се направат некои амандмани на Уставот на Македонија, но името Македонија да остане во решението. Земјата би останала Македонија, само би добила географска одредница“, коментира овој аналитичар од Вашингтон.
Решението за името, според Бугајски, ќе ја стави Македонија на брза патека кон членство во НАТО, на следниот самит уште во јули. Од членство корист ќе имаат сите граѓани на Македонија, коментира овој аналитичар од Вашингтон.
Facebook Forum