Израелските сили извршија воздушни напади во јужен Либан, во кои загинаа четири лица, според либанските здравствени власти.
Израелската војска соопшти дека нападите во областа Набатије биле насочени кон милитантите на Хезболах, додека Хезболах соопшти дека извршил напад со беспилотни летала насочени кон Израел.
Нападите се најнови во прекуграничните борби меѓу Израел и Хезболах кои ескалираа со војната меѓу Израел и Хамас во Појасот Газа, а доаѓаат во време кога меѓународната заедница работи на избегнување на ескалација на конфликтот во регионот.
Овие грижи се зголемија минатата недела со израелски напад во кој беше убиен командант на Хезболах во Бејрут и напад во кој беше убиен политичкиот шеф на Хамас во Техеран за кој Иран и Хамас го обвинуваат Израел.
„Тензиите продолжуваат да ескалираат на Блискиот Исток, доведувајќи го на работ на војна од непознати размери“, изјави шефот за надворешна политика на ЕУ, Жозеп Борел.
„Сите ние мора да спречиме нова катастрофа. Патот напред е главно консензуален: прекин на огнот во Газа, сега“, рече Борел.
Јужна Кореја стана последната земја која издаде предупредување за патување во регионот, повикувајќи ги своите граѓани да го напуштат Израел и Либан што е можно поскоро.
Американскиот секретар за одбрана Лојд Остин и израелскиот министер за одбрана Јоав Галант разговараа за ситуацијата, при што Остин ја повтори „непоколебливата посветеност на САД за безбедноста на Израел“ во лицето на заканите од Иран и неговите полномошници како Хезболах, се вели во соопштението на Пентагон.
Прес секретарот на Пентагон, генерал-мајор Пат Рајдер рече дека Остин и Галант се согласиле дека нападот на паравојската подредена на Иран врз американските сили во западен Ирак „означи опасна ескалација и ја покажа дестабилизирачката улога на Иран во регионот“.
Претставник на американската одбрана за Гласот на Америка изјави дека во нападот биле повредени неколку американски персонал.
Израелската војска, исто така, соопшти дека нејзините сили извршуваат операции во централниот и јужниот дел на Појасот Газа и дека израелските авиони извршиле воздушен напад во областа Џенин на окупираниот Западен Брег.
Палестинските здравствени власти соопштија дека во нападот загинале четири лица, додека израелска рација во селото Акаба на Западниот Брег убила уште четири лица.
Израел вети дека ќе го уништи Хамас како одмазда за неговиот терористички напад на 7 октомври во кој загинаа 1.200 луѓе и доведе до фаќање на 250 заложници. Во израелската контраофанзива загинаа најмалку 39.650 луѓе во Газа, главно жени и деца, според Министерството за здравство на Газа, додека Израел вели дека бројот на загинати вклучува илјадници борци на Хамас што ги уби.
Некои информации за овој извештај дадоа Асошиетед прес, Франс прес и Ројтерс.