Борбите меѓу Хамас и Израел се обновени во Газа по седумдневниот прекин што ја олесни размената на заложници и палестински затвореници и протокот на хуманитарна помош во опустошената енклава.
Израелските одбранбени сили во петокот соопштија дека продолжувањето на борбите е по прекршувањето на привременото примирје од страна на Хамас и ракетниот напад на милитантната група врз Израел.
Обновеното насилство доаѓа во време на извештајот на „Њујорк тајмс“ дека Израел однапред знаел за деталниот план на Хамас за напад на Израел, но дека планот бил отфрлен како „аспиративен“.
Преведениот документ од околу 40 страници, со кодно име „Јерико Ѕид“ и прегледан од Тајмс, детализираше како Хамас ќе изврши повеќестран напад врз позициите на израелската одбрана и ќе ги преземе градовите. Не е одреден датум за нападот.
Тајмс објави дека израелските воени и разузнавачки претставници имале знаење за планот повеќе од една година пред нападот на 7 октомври. Не беше јасно дали и израелскиот премиер Бенјамин Нетанјаху има сознанија.
Немаше итна реакција од страна на израелската влада на извештајот на Тајмс.
И покрај тоа што звуците и мирисите на војната се враќаат во Газа, меѓународните посредници продолжуваат да преговараат за да бараат прекин на борбите.
Израелската армија соопшти на социјалната медиумска платформа Х, порано позната како Твитер, дека „успешно го пресретнала“ лансирањето на ракетата од Газа.
Засега нема преземено одговорност од Хамас за ракетниот напад.
Министерството за здравство на Газа, управувано од Хамас, соопшти дека најмалку 32 лица загинале во првите часови од обновените борби во петокот.
Летоците што Израел ги фрли во Кан Јунис во јужниот дел на Газа ги советуваат луѓето таму да патуваат појужно за нивна безбедност.
Џејмс Елдер, портпарол на УНИЦЕФ, во видеото објавено на X, од „најголемата, сè уште функционална“ болница во Газа рече дека „Оваа болница едноставно не може да прими повеќе деца со раните од војната“. Тој рече дека бомба паднала „буквално на 50 метри одовде“.
Елдер рече: „Неделувањето на оние со влијание дозволува убивање деца. Ова е војна против децата“.
Враќањето на борбите доаѓа по седумдневното примирје што овозможи размена на израелски заложници од нападот на Хамас врз Израел на 7 октомври за палестински затвореници.
Во четвртокот, Хамас ослободи осум израелски заложници во Газа според продолжувањето на примирјето, а кратко време подоцна Израел ослободи 30 палестински затвореници додека преговарачите се обидоа повторно да ја продолжат паузата во борбите.
Две жени биле ослободени попладнето, а уште шест биле ослободени нешто пред полноќ. Тоа беше седмата група заложници ослободени според привремениот договор за примирје меѓу Хамас и Израел.
Израел првично бараше од милитантната група да ослободува најмалку 10 заложници дневно за примирјето да продолжи, но портпаролот на катарското Министерство за надворешни работи рече дека во четврток нема да бидат ослободени дополнителни заложници. Катар помогна да се постигне примирје.
Портпаролот на Катар рече дека Израел ги прифатил осумте заложници бидејќи Хамас во средата ослободил уште двајца заложници, кои биле израелско-руски жени.
Хамас навести дека може да ослободи уште двајца израелско-руски граѓани, но милитантната група на крајот не го стори тоа. Хамас, исто така, претходно соопшти дека во четврток ќе ги ослободи телата на тројца израелски заложници, но не е јасно дали тоа се случило.
За возврат, Израел ослободи 30 Палестинци од затворите во Израел.
До денес, Хамас ослободи 105 заложници, а Израел ослободи 240 палестински затвореници. Хамас е прогласен за терористичка организација од страна на САД, Велика Британија, Европската Унија и други.
Американскиот државен секретар Ентони Блинкен во четвртокот во Тел Авив се сретна со израелскиот претседател Исак Херцог. На почетокот на состанокот, Блинкен му рече на Херцог дека САД веруваат дека примирјето дава резултати и дека треба да продолжи.
„Во текот на минатата недела видовме многу позитивен развој на заложниците кои се враќаат дома, се обединуваат со нивните семејства, а тоа треба да продолжи и денес“, рече Блинкен.
„Тоа, исто така, овозможи значително зголемување на хуманитарната помош за невините цивили во Газа, на кои очајно им е потребна“, рече тој.
Блинкен треба да го заврши своето патување на Блискиот Исток со посета на Обединетите Арапски Емирати во петок, каде што се очекува да разговара за Газа со лидерите на арапскиот свет кои присуствуваат на Конференцијата на ОН за климата во Дубаи.
Некои информации за оваа приказна дојдоа од Асошиетед прес, агенцијата Франс прес и Ројтерс.