Претседателот на Малави рече дека потпретседателот Саулос Чилима, неговата сопруга и осум други загинале кога нивниот авион се урнал во густа шума во понеделникот.
Денеска во телевизиско обраќање до нацијата, претседателот Лазарус Чаквера рече дека тимовите за пребарување и спасување ги пронашле „целосно уништените“ остатоци од авионот во близина на рид во шумата Чикангава во Малави. Тој рече дека нема преживеани.
51-годишниот Чилима и неговата партија се наоѓале во военото летало кое тргнало од главниот град Лилонгве во понеделникот во 9:17 часот по локално време, кон северниот град Мзузу. Поради лошите временски услови авионот не можел да слета на аеродромот Мзузу, и добил наредба да се врати во главниот град. Кратко време подоцна авионот исчезнал.
Во своите коментари, Чаквера ја нарече несреќата „срцепарателна“ и рече дека ја разбира беспомошноста што нацијата ја чувствува од загубата. Тој го опиша потпретседателот како добар човек, посветен татко и сопруг кој службено ѝ служел на својата земја.
„Сметам дека е една од големите почести во мојот живот да го имам како мој заменик и советник во изминатите четири години“, рече тој за Чилима.
Војската на Малави ја водеше потрагата по авионот и доби помош од соседните нации, според командантот на одбранбените сили на Малави, Пол Валентино Фири. Тој рече дека потрагата, која траела во текот на ноќта, била отежната поради лошите временски услови и нерамниот терен.
Седум патници, меѓу кои и поранешната прва дама на Малави, Шанил Џимбири и тројца воени членови на екипажот, се наоѓале во авионот.
Претседателот Чаквера рече дека тој самиот летал во авионот, а екипажот успешно го управувал неколку часа пред падот.
За прв пат избран за потпретседател во 2014 година, Чилима се соопштува дека бил широко популарен во Малави, особено меѓу младите, и се сметал за кандидат за претседател на изборите следната година.
Но, во 2022 година, на Чилима му беа одземени овластувањата откако беше уапсен и обвинет за мито поради скандал со поткуп во кој беше вмешан британско-малависки бизнисмен.
Минатиот месец, судот во Малави ги отфрли обвиненијата и тој продолжи со своите службени должности.
Дел од информациите се од Асошиетед прес, Ројтерс и агенцијата Франс – прес.