Неказнивоста на политичарите и други високи функционери, како и нивното лесно бегство од државата се лоша порака до граѓаните сметаат познавачите на приликите. Последниот случај со бегството на поранешниот вицепремиер во македонската Влада, Артан Груби, како и на поранешниот директорот на Државна лотарија, Прпарим Бајрами се само доказ за тоа. За нив веќе е распишана и меѓународна потерница.
Поранешната шефица на Обвинителството за организиран криминал и корупција, Вилма Русковска за Гласот на Америка вели дека неказнивоста била озаконета, уште со последните измени на кривичниот законик, кога скандалозно биле намалени казните.
„На пример вие имате случаи, некој да ви украде паричник на улица ќе добие многу поголема казна затвор, отколку некој ако украде милиони од државата. И, во секој случај се негативни пораките кон граѓаните, но според мене извор на сето тоа се измените на Кривичниот законик“, рече таа.
Според неа работите можат да се вратат во нормала кога би стапил на сила новиот Кривичен законик, во чија што изработка учествувала и таа.
„А, таму се третираат кривичните дела онака како што треба да се третираат. И, сметам дека под итно треба да се достави тој Кривичен законик до Собранието, за граѓаните повторно да имаат некоја надеж дека правда можеби и ќе има“, вели Русковска.
И, Александар Кржаловски, извршен директор на Македонскиот центар за меѓународна соработка, смета дека ова кај граѓаните остава лоша порака.
„Може да се подразбира така дека политичарите се уште можат да се извлечат од криминални дејствија без да одговараат за тоа“, рече Кржаловски.
Кржаловски смета дека последните случувања со бегството на Груби биле за очекување, иако во прво време самиот тој демантирал дека е во бегство, а сега поставува услови за евентуално враќање откако било покренато обвинение против него, што само ја потврдило тезата дека се работело за бегство и дека не е подготвен да се јави пред лицето на правдата
„Има и тези дека ова им одговара на сите за да нема турбуленции и немири во општеството со евентуално негово затворање, приведување, казнување, што може да предизвика протести. На некој начин може да се смета и дека е можеби договорено, што од друга страна ја руши довербата во институциите и системот“, додава Кржаловски.
Русковска пак ги повикува политичарите да не се мешаат во работата на судството и полицијата.
„Нашиот премиер деновиве надвор од своите ингеренции зборуваше дека ќе има големи апсења, големи приведувања, што не е негова работа и е недозволиво тоа да го прави. На некој начин овозможи не само на Груби и на припадниците на Беланоца од Арачиново за избегаат“, вели Русковска.
Освен Груби и екс премиерот Никола Груевски е во бегство и се наоѓа во Унгарија, откако беше осуден за неколку кривични дела. И, двајцата се на црната листа на САД.