Зурли и тапани три дена ечеа во познатото мијачко село каде викендов се одржа Галичка свадба, белегот на македонската култура и вековна традиција. Свадбата во Галичник годинава се одржа по 61. пат, а младенци беа Стефана Димитрова и Даријан Кочоски.
Китење на невестата, гледање на момчето низ прстен, бричење на младоженецот, одење на вода, канење на мртвите и уште голем број адети поврзани со оваа свадба, која е и своевиден театар, можеа да видат домашните и странските гости кои и годинава дојдоа во Галичник.
Возрасни, деца, мажи, жени, облечени во автентични стогодишни и постари носии ги оживеаја годините од минатото во Галичник кога печалбарите се враќале за Петровден и се правеле бројни свадби низ селото.
Дополнителен белег беа дебарските Мајовци, кои од генерација, на генерација го пренесуваат талентот за доловување на исконските звуци од зурлите и тапаните, како главен музички белег на Галичката свадба.
Мајсторијата на професионалните играорци од групата „Танец“ во изведбата на познатото македонско оро „Тешкото“, речиси никого не оставија рамнодушен во публиката, домашна и странска, во Галичник.
На годинешната Галичка свадба, како покровител, присуствуваше претседателката Гордана Сиљановска Давкова, која на младенците им подари галичка пафта, дел од накитот на традиционалните мијачки носии. Меѓу бројните гости беше присутен и евроамбасадорот Дејвид Гир.
Во продолжение погледнете ја низ фотографии и видео атмосферата на годинешната 61. Галичка свадба:
Галичка свадба: Белег на македонската историја и култура
