Кина вети дека ќе преземе контрамерки против планот на претседателот на САД Доналд Трамп за воведување дополнителни царини за кинески производи вредни 200 милијарди долари.
Новите царини, кои ќе влезат во сила на 24-ти септември, ќе бидат во висина од десет проценти, а на почетокот на следната година ќе пораснат до 25 проценти.
Царините се однесуваат на голем број производи, вклучувајќи електроника, храна, алатки и производи за домаќинството.
Голем број производи беа изземени од новите царини, вклучувајќи паметни телефони, детски седишта за автомобили и некои видови електроника.
Министерството за трговија на Кина денес издаде соопштение во кое предупредува дека ќе воведе царини за американски производи со цел „заштита на легитимните права и интереси и глобалниот трговски поредок.“
Пекинг претходно објави листа на американски производи за кои ќе бидат воведени царини во висина од 60 милијарди долари.
Во соопштението во кое беа објавени новите американски царини, Трамп предупреди дека „ако Кина преземе одмазднички мерки против нашите фармери и индустријата, ние веднаш ќе преминеме на спроведување на третата фаза која предвидува воведување на дополнителни царини врз кинески производи вредни 267 милијарди долари.“
Кина претходно кажа дека нови трговски преговори со Вашингтон се добредојдени, но, исто така сугерираше дека нема да преговара ако САД воведат нови царини.
Facebook Forum