Линкови за пристапност

Трамп: Позитивниот напредок за Северна Кореја може да значи и лажна надеж


Претседателот на САД Доналд Трамп, кажа дека со Северна Кореја е постигнат „можен напредок“, но предупреди дека позитивните знаци од страна на Пјонгјанг, може да водат кон „лажна надеж“.

Изјавата на Трамп уследи откако Јужна Кореја денеска соопшти дека Северот е подготвен да започне разговори со САД за откажување од нуклеарното оружје.

Трамп на Твитер напиша: „За прв пат по многу години, направен е сериозен напор од сите засегнати страни“. Тој истовремено изрази сомневање за намерите на Северна Кореја и додаде: „Светот гледа и чека. Може да биде лажна надеж, но САД се подготвени да бидат цврсти во која било насока“.

Потпретседателот Мајк Пенс имаше претпазлив одговор на најновите случувања. „Во која и да е насока да појдат разговорите со Северна Кореја, ќе бидеме цврсти во нашата определеност“, истакна Пенс, нагласувајќи дека „сите опции се на маса, а нашиот став кон режимот нема да се промени, се` додека не видиме веродостојни, проверливи и конкретни чекори кон денуклеаризација“.

Највисокиот советник за безбедност на Јужна Кореја, Чунг Еи-Јонг, изјави дека Пјонгјанг сигнализирал дека нема потреба да се задржи неговата нуклеарна програма, ако се елиминираат воените закани против државата. Тој додаде дека Северна Кореја е подготвена да разговара за денуклеаризација и нормализирање на односите со САД.

Изјавата на Сеул не е потврдена од Северна Кореја.

Демократскиот сенатор Бен Кардин, за Гласот на Америка кажа дека најавата на Сеул е „позитивен знак“ и ја повика администрацијата на Трамп „да ја искористи предноста на ситуацијата“. „Ние признаваме дека единствен разумен начин да се стави крај на оваа криза, е преку дипломатија, а започнува со тоа што Северна Кореја ќе ја замрзне својата актуелна нуклеарна програма“, рече тој.

Facebook Forum

XS
SM
MD
LG