Американската администрација се закани со санкции, ако Меѓународниот кривичен суд во Хаг спроведе истрага за наводите за сторени воени злосторства од страна на американски воен и разузнавачки персонал во Авганистан.
Се очекува во говорот кој американскиот советник за национална безбедност Џон Болтон треба да го даде во Вашингтон тој да искаже цврст став кон судот и дека Меѓународниот кривичен суд не треба да има јурисдикција врз американските државјани и врз државјаните од држави кои никогаш не го ратификувале договорот кој го создал самиот суд.
Меѓународниот кривичен суд започна со работа во 2002-ра година и беше создаден како постојана и независна институција која треба да ги истражува воените злосторства и злосторствата против човештвото и геноцидот.
Во нацрт текстот на Болтон се вели дека САД нема да соработуваат со Меѓународниот кривичен суд и дека ако се покрене истрага за американските активности во Авганистан, администрацијата на Трамп ќе ги разгледа можностите за забрана за патување, замрзнување на средства и можно судење во американските судови за судиите и обвинителите вклучени во истрагата.
Минатата година, обвинителката од Меѓународниот кривичен суд, Фату Бенсуда, побара судско овластување за истрага за наводите за несоодветно однесување од страна на воените припадници и ЦИА во Авганистан.
Наводните воени злосторства вклучуваат извештаи од тајни центри за притвор во Авганистан и на територија на други нации кои се дел од Меѓународниот кривичен суд, во периодот од 2003-та и 2004-та година.
Пентагон се противи на можната истрага и рече дека тие ги почитуваат правилата на водење војна.
Facebook Forum