Новата анкета на Центарот за истражување Пју сугерира дека светот во голем дел го поддржува свртувањето на фокусот на американската одбрамбена политика кон Азија, како и армиската кампања под американско раководство против организацијата Исламска држава - двете главни точки во надворешната политика на Белата куќа.
Генералниот рејтинг на САД останува главно позитивен. Пју го спровел испитувањето на јавното мислење во 40 држави. Во просек, 69% од испитаниците изразиле поволно мислење за земјата.
Бројките најверојатно ќе бидат интерпретирани како успех за владата на претседателот Барак Обама, којашто дојде на власт во 2008-ма со ветување дека ќе ја подобри претствата за САД во странство, делумно преку ставање крај на армиските операции во Ирак и Авганистан.
Но, Белата куќа потоа повторно беше вовлечена во случувањата во регионот, овојпат поради брзиот напредок на исламските екстремисти во Ирак и Сирија. САД во моментов се на чело на воздушната кампања против цели на Исламската држава во овие земји и се обидуваат да обезбедат обука за силите коишто ги сметаат за сојузници.
Светот главно позитивно реагира на оваа кампања. Според центарот Пју, во просек, 62% искажуваат поддршка, а 24% се против.
Анкетата илустрира и силна поддршка за одлуката на САД да стави поголем армиски приоритет на Пацификот, каде повеќето земји изразија загриженост заради растечката економска и армиска сила на Кина и нејзината самодоверба.
Во просек, 51% од испитаниците го поддржуваат зголеменото армиско присуство на САД во Азија, а 34% се изјасниле против. Поддршката е особено голема на Филипините, во Виетнам и Јапонија, земји коишто имаат територијален спор со Кина. Пју наведува дека исклучок е Малезија, каде 54% од анкетираните велат дека новата одбранбена политика на САД кон Кина е лоша идеја бидејќи може да доведе до судир со оваа земја.