Американскиот Оддел за правда обвини шестмина босански имигранти за обид да испратат пари и опрема на терористи во странство, а меѓу нив и на припадници на Исламската држава во Ирак и Сирија.
Во федералното обвинение, обелоденето на 6-ти февруари годинава, двајца од шестмината се товарат за заговор за убиство и осакатување на лица во странска земја. Според обвинителниот акт, заговорот датира уште од мај 2013-та.
„Обвиненијата и апсењата ја подвлекуваат нашата решеност да ги идентификуваме и да земеме на одговорност поединците коишто во САД кои се обидуваат да пружат материјална поддршка за терористите и нивните операции во Сирија и Ирак“, изјави американскиот помошник-главен обвинител Џон Карлин. „Спречувањето на набавки, пари и персонал за странските терористички организации како Исламската држава останува приоритет“, рече Карлин.
Сите шест лица живеат во САД легално, во три различни сојузни држави: Њујорк, Илиноис и Мисури. Тројца станале државјани, а другите тројца имале или статус на бегалци, или пак зелени карти. Петмина од нив биле во САД и се уапсени. Шестиот бил во странство, но според дел од медиумските извештаи, бил убиен минатата година.
Пари и армиска опрема
Во обвинението стои дека осомничените во Турција испраќале пари преку Пејпал, а купувале и праќале и американски воени униформи, чизми, облека и опрема за тактички операции, опрема од воени отпади, придружни средства за огнено оружје, нишани за пушки и материјал за прва помош.
Опремата и парите стигнале до борците во Сирија, Ирак и на други места, а биле испраќани и пари до членови на нивните семејства.
Обвинението наведува дека осомничените биле свесни каде одат парите и опремата и дека преку телефон и Фејсбук испраќале и примале пораки, користејќи лажни имиња и шифри како „Лавови“, „Босански браќа“, „муџахедини“ и „маченици“, како и „плажа“ - асоцијација за места во Ирак и Сирија.
Обвинетите се 40-годишниот Рамиз Зијад Хоџиќ, неговата сопруга Седина Ункиќ Хоџиќ (35) и Армин Харчевиќ (37), сите од Сент Луис, Мисури; Нихад Росиќ (26) од Јутика, Њујорк; и Медиха Меди Салкичевиќ (34) и Јасминка Рамиќ (42) од Шилер Парк и Рокфорд, Илиноис.
Доколку бидат осудени за заговор за обезбедување на материјална поддршка и давање на таква поддршка на терористи, овие лица може да добијат доо 15 години затвор за секоја точка посебно и и парична казна до 250.000 долари. Рамиз Зијад Хоџиќ и Нихад Росиќ се обвинети и за заговор за убиство и осакатување на лица во странство и доколку бидат осудени, се соочуваат со доживотна казна затвор.
Менсур Хатиќ, водач на босанската заедница во Сент Луис и сопственик на радио и ТВ-станица во Босна, за босанската редакција на Гласот на Америка изјави дека сопружниците Хоџиќ биле под надзор на ФБИ уште од 2013-та.
„Хоџиќ дојде во САД пред 10 години, страдајќи од посттрауматски стрес. Тој учествувал во војната во Босна од 1992-ра до 1995-та во Теслиќ каде што бил одликуван со орден за храброст. Конзумирал големи количини на алкохол неколку години откако дошол во САД, но последниве години прекинал и на сопругата и ќерката им наредил да носат хиџаб. Но, не знаевме дека бил вмешан во оваа мрежа на поддржувачи на Исламската држава“, вели Хатиќ.