УНИЦЕФ објави дека околу 43 милиони деца ширум светот биле раселени во период од шест години поради катастрофи поврзани со временските услови, додека дневно се преселуваат речиси 20 000 деца.
Раселените деца во услови на климатски промени е анализа на бројот на раселени деца во 44 земји, а главната причина за преселувањето е главно поради поплави, бури, суши и шумски пожари од 2016 до 2021 година.
Овој прв ваков извештај исто така проектира раселување во следните 30 години.
Кина и Филипините се меѓу земјите со најголем број регистрирани детски раселувања. Сепак, во извештајот се вели дека децата во посиромашните земји „се несразмерно погодени од екстремните временски услови“.
„Имаме алатки и знаење за да одговориме на овој ескалирачки предизвик за децата, но дејствуваме премногу бавно“, рече извршната директорка на УНИЦЕФ, Кетрин Расел.
„Треба да ги зајакнеме напорите да ги подготвиме заедниците, да ги заштитиме децата кои се изложени на ризик од раселување и да ги поддржиме оние кои се веќе искоренети“.
Тековните податоци покажуваат дека речиси 96 милиони деца во следните 30 години би можеле да бидат раселени поради поплави на реките, додека циклонските ветрови и бурите би можеле да преселат 10,3 милиони и 7,2 милиони деца, соодветно, во текот на 30-годишниот период.
„Вистинскиот број речиси сигурно ќе биде поголем“, велат од УНИЦЕФ, поради посериозните временски услови кои се резултат на „променливата клима“.