Линкови за пристапност

Познато името на идниот секретар за здравство


Новоизбраниот претседател Доналд Трамп на функцијата ќе го назначи конгресменот од Џорџија Том Прајс, критичар на Обамакеар

Новоизбраниот претседател на САД Доналд Трамп соопшти дека конгресменот од Џорџија Том Прајс, ќе биде назначен на функцијата секретар за здравство. Прајс е познат по критиките на реформите во здравството познати како Обамакеар.

За време на кампањата, Трамп велеше дека ќе го поништи планот, но оттогаш има изјавено дека можно е да задржи одредени делови од него.

Идниот американски претседател во меѓувреме се сретна со уште еден можен кандидат на функцијата државен секретар, поранешниот директор на ЦИА и генерал во пензија Дејвид Петреус. Пред позицијата во ЦИА, Петреус беше американски командант во Ирак и ги предводеше силите на НАТО во Авганистан. Тој беше приморан да даде оставка на функцијата во 2012, заради давање доверливи информации на жена која ја пишувала неговата автобиографија и со која имал вонбрачна афера.

И покрај неговото минато, Трамп преку Твитер кажа дека бил, „мошне импресиониран од генералот“.

Други кандидати за шеф на американската дипломатија се и поранешниот гувернер на Њујорк, Руди Џулијани, поранешниот амбасадор на САД во ОН Џон Болтон, претседавачот на Сенатската комисија за односи со странство Боб Коркер, и поранешниот гувернер на Масачусетс Мит Ромни. Трамп денеска се очекува да оствари втора средба со Ромни.

XS
SM
MD
LG