Вербалните напади за време на првата дебата меѓу претседателот Доналд Трамп и поранешниот потпретседател Џо Бајден предизвикаа поделени реакции.
Рона Мекданиел, која е на чело на Националниот комитет на Републиканската партија, на Твитер напиша дека во рок од 90 минути, Трамп испратил сигурна и импресивна порака зошто треба да биде реизбран за претседател, и оти покажал дека Бајден поддржува радикални позиции, зголемување на даноци, уништување на работни места и несигурни заедници.
Тим Марто, директор за комуникации на кампањата на претседателот Трамп, за Гласот на Америка, рече дека претставувањето на Трамп било фантастично.
„Она што гледачите го видоа е дека претседателот Трамп имаше контрола врз секој момент од дебатата, и мислам дека она што го видоа е слаб Џо Бајден“, рече тој.
Демократите, пак, велат дека Трамп покажал зошто не треба да му се довери втор мандат.
„Доналд Трамп ја разочара држвата со лаги, расизам и несоодветно лидерство“, напиша на Твитер демократскиот сенатор од Њу Џерси Кори Букер.
Уредничката во Вашингтон пост Карен Атија, го осуди гласното и хаотично разменување меѓу двајцата кандидати, нарекувајќи го вчерашниот настан „национален срам“.
Поранешниот републикански сенатор Џеф Блејк рече дека државата е подобра од она што можело да се види на дебатата.
Политикологот од Универзитетот на Вирџинија Лери Сабато, побара да се откажат наредните претседателски дебати.
Facebook Forum