Исак се заканува на американското јужно крајбрежје
Како изгледа одозгора: Исак на сателитска снимка на НАСА
Исак се заканува на американското јужно крајбрежје
Вонредна состојба во Алабама, Флорида, Луизијана и Мисисипи.
Тропското невреме Исак денес навлезе во Мексиканскиот Залив, откако поројните врнежи од дожд и ветриштата најпрвин ја погодија најјужната точка на Флорида, архипелагот Флорида Кис, и областа на Мајами.
Ветришта пред дожд: сцена од Ки Вест, Флорида
Националниот центар за урагани очекува Исак да прерасне во ураган пред да допре до јужното американско крајбрежје, што, според проценките би требало да се случи на потегот од Флорида до Луизијана.
Четири сојузни држави - Алабама, Флорида, Луизијана и Мисисипи - прогласија вонредна состојба, подготвувајќи се за Исак.
Директорот на националниот центар за урагани Рик Наб ги покажува можните патеки на Исак
Вонредна состојба прогласи и градоначалникот на Њу Орлеанс Мич Ландру, советувајќи ги сограѓаните да се подготват за ситуација во која би биле без вода и електрична енергија неколку дена. Ландру им порача веднаш да заминат доколку биде објавен повик за евакуација. Многумина тоа не го сторија 2005-тата, кога ураганот Катрина го погоди Њу Орлеанс. Тогаш загинаа преку 1.800 лица, а илјадници останаа без покрив над главата.
