Јапонија го прекина предупредувањето за цунами по серијата големи земјотреси, но им порача на жителите долж нејзиното западно крајбрежје да не се враќаат во своите домови, бидејќи смртоносните бранови сè уште можат да го погодат регионот.
Јапонската метеоролошка агенција објави повеќе од десетина земјотреси во Јапонското Море во близина на брегот на Ишикава и околните префектури во доцните попладневни часови. Најголемата беше со јачина од 7,6 степени, кога се урнаа згради на западниот брег на главниот јапонски остров Хоншу. Не се знае дали има жртви.
Најмалку шест домови беа оштетени од земјотресите, а луѓето биле заробени внатре, изјави владиниот портпарол Јошимаса Хајаши. Пожар избувнал и во градот Ваџима, во префектурата Ишикава, а струјата била исклучена кај повеќе од 30.000 домаќинства, рече тој.
Метеоролошката агенција првично издаде големо предупредување за цунами за Ишикава и предупредување за цунами на пониско ниво или совети за остатокот од западниот брег на Хоншу, како и за најсеверниот од нејзините главни острови, Хокаидо.
Неколку часа подоцна, предупредувањето беше намалено на редовно цунами, што значи дека брановите можат да достигнат и до три метри, а последователни потреси, исто така, може да ја погодат истата област во текот на следните неколку дена, се вели во извештајот. Хајаши нагласи дека е критично за жителите во крајбрежните области да се спасат од можни цунами.
Некои информации за овој извештај се од Асошиетед прес, агенцијата Франс прес и Ројтерс.
