На мајката на починатиот руски опозициски лидер Алексеј Навални и се одбива пристап до неговото тело веќе трет ден, соопшти неговиот тим во понеделникот додека неговата вдовица се подготвува да се сретне со европските министри за надворешни работи.
Смртта на Навални во арктичкиот затвор минатата недела ја шокираше опозицијата во егзил во земјата која заедно со Западот го впери прстот кон Кремљ.
Сојузниците на Навални рекоа дека инспекторите и кажале на неговата мајка Људмила дека истрагата за неговата смрт во затвор „е продолжена“.
Руската затворска служба соопшти дека Навални (47) починал во петокот по прошетката во неговиот оддалечен затвор над Арктичкиот круг.
Неговата мајка отпатувала во изолираната затворска колонија во градот Харп околу 2.000 километри од Москва во саботата, но ѝ било кажано дека неговото тело не е таму.
Таа потоа беше испратена во мртовечница во регионалниот центар Салехард, но тамошните власти, исто така, не и дозволија пристап до телото.
„Мајката на Алексеј и неговите адвокати пристигнаа во мртовечницата рано наутро. Не им беше дозволено да влезат“, изјави на социјалните мрежи портпаролката на Навални, Кира Јармиш.
„Еден од адвокатите беше буквално истуркан. Кога персоналот беше прашан дали телото на Алексеј е таму, тие не одговорија“, додаде таа.
Таа подоцна рече дека на мајката, која не зборувала јавно и било кажано дека истрагата за неговата смрт се пролонгира.
„Не се знае колку долго ќе продолжи. Причината за смртта се уште е „неутврдена“.
„Тие лажат, играат со времето и не го ни кријат тоа“, рече Јармиш.
Тимот на Навални, кој оперира надвор од Русија повеќе од две години, побара неговото тело да им биде предадено на роднините.
Тие ги обвинија властите дека „ги прикриваат трагите“.
Путин сè уште не ја коментирал смртта, и покрај тоа што се појави во јавноста откако беше објавеноза смртта на Навални.
Властите уапсија стотици ожалостени кои донесоа цвеќиња на локалните споменици во Русија во текот на викендот, соопштија групите за заштита на човековите права.
Додека неговите роднини и адвокати го бараа неговото тело на рускиот далечен север, неговата вдовица Јулија Навалнаја замина за Брисел за да се сретне со министрите за надворешни работи на ЕУ.
Таа го сметаше Путин лично одговорен за смртта на нејзиниот сопруг.
„Сакам Путин и целото негово опкружување, пријателите на Путин и неговата влада да знаат: ќе сносат одговорност за она што и го направија на нашата земја, на моето семејство, на мојот сопруг“, рече таа кога беше објавена смртта во петокот.
Навалнаја се упати кон Брисел
Западот ги обвини Путин и неговата влада за смртта на Навални.
Шефот за надворешна политика на ЕУ, Жозеп Борел, рече дека ќе ја пречека Јулија Навалнаја во Советот за надворешни работи на блокот во понеделник.
„Министрите на ЕУ ќе испратат силна порака за поддршка на борците за слобода во Русија“ и ќе го „почестат“ споменот на Навални, додаде тој на X, порано Твитер, во неделата.
Навалнаја беше покрај Навални во текот на неговата повеќедецениска борба против Кремљ.
Таа успеа да го однесе од Русија кога во 2020 година беше отруен со, како што рекоа лекарите, нервен агенс и пркосно се врати со него во Москва, знаејќи дека ќе оди во затвор, во 2021 година.
Додека Западот го зголемуваше притисокот врз Русија, обвинувајќи го Путин за смртта, Кремљ молчеше.
Руското Министерство за надворешни работи ги отфрли „опширните обвинувања“ од Западот неколку часа по смртта, но оттогаш ниту еден од високите функционери не коментираше.
Руската затворска служба во кратко соопштение соопшти дека Навални починал „по прошетка“ во колонијата ИК-3, позната како „Поларниот волк“.
Во пораката од затворот на 9 јануари, Навални ја опиша пешачката ќелија како „11 чекори од еден ѕид и три чекори до друг“.
Тој рече дека бил донесен на прошетка „нормално по ручекот“ или, ако бил во самица, „во 6.30 часот“ и покрај поларните ноќи.
„Досега не беше постудено од -32 Целзиусови степени“, рече тој.
„Постојат неколку работи кои ве зајакнуваат како прошетка во (арктичкиот регион) Јамал во 6.30 часот“, се пошегувал политичарот во негов вообичаен саркастичен стил.
Навални продолжи од зад решетки да ги повикува Русите да се борат против режимот, повикувајќи ги „да не се плашат“.
Тој, исто така, во очај гледаше како Русија ја започна својата офанзива во Украина, осудувајќи ја од неговиот затвор.
Извор: Агенција Франс прес