Линкови за пристапност

Тилерсон: Воена опција не е исклучена по провокација од Северна Кореја


Државниот секретар на САД ова го порача од Сеул

Американскиот државен секретар Рекс Тилерсон кажа дека воена акција против нуклеарно вооружената Северна Кореја е „опција која стои на маса“, откако предупреди дека политиката на стратешко трпение со Пјонгјанг е завршена.

На денешната прес-конференција во Сеул, заедно со јужнокорејскиот министер за надворешни работи Јун Бјунг-сe, Тилерсон сигнализираше значајна промена на американската политика кон Северна Кореја, велејќи дека развивањето на ракетната и нуклеарна програма мора да престане:

„Да биде јасно, политиката на стратешко трпение заврши. Ние разгледуваме нов опсег на дипломатски, безбедносни и економски мерки и сите опции се на маса.“

Тилерсон кажа дека е создаден „сеопфатен збир на можности“ за справување со изолираната нација која технички се` уште е во војна со јужниот сосед.

Американскиот дипломат ја посети и демилитаризираната зона која ги разграничува Северна и Јужна Кореја.

Тој вчера беше во посета на Јапонија, а Јужна Кореја е втора станица од азиската турнеја.

Последна станица на Тилерсон е Кина, каде што на неговата агенда е состанок со претседателот Ши Џинпинг. Разговорите со Ши, исто така ќе бидат подготовка за средбата меѓу претседателите на двете држави, планирани за април, во Флорида.

XS
SM
MD
LG