Советникот за национална безбедност на Белата куќа Џејк Саливан, викендов се сретна со кинескиот министер за надворешни работи Ванг Ји во Малта, соопштија Пекинг и Вашингтон вчера, додека двете најголеми светски економии се обидуваат да ги стабилизираат проблематичните односи.
Двете страни одржаа „искрени, суштински и конструктивни“ разговори за време на повеќекратните состаноци одржани на 16-17 септември, според одделните изјави на Белата куќа и кинеското Министерство за надворешни работи објавени вчера.
Состанокот на Саливан со Ванг беше последен во серијата дискусии на високо ниво меѓу американските и кинеските официјални лица што може да ја постави основата за средба на американскиот претседател Џо Бајден и кинескиот претседател Шји Џјинпинг подоцна оваа година.
Последен пат Саливан се сретна со Ванг во Виена во мај.
Кинеското министерство за надворешни работи соопшти дека двете страни се согласиле да одржуваат размена на високо ниво и да одржат билатерални консултации за азиско-пацифичките прашања, поморските работи и надворешната политика.
Белата куќа додаде дека двете страни „се обврзале да го задржат овој стратешки канал на комуникација и да продолжат со дополнителен ангажман и консултации на високо ниво во клучните области во наредните месеци“.
Вашингтон рече дека Саливан ја забележал важноста на мирот и стабилноста преку Тајванскиот теснец, додека Ванг ги предупреди САД дека тајванското прашање е „првата непремостлива црвена линија на кинеско-американските односи“, се вели во соопштението на кинеското Министерство за надворешни работи.
Бајден овој месец изрази разочарување што Шји го прескокна самитот на лидерите на Г20 во Индија, но рече дека „ќе го види“.
Следната веројатна можност Бајден да разговара со Шји е самитот на Азиско-пацифичката економска соработка (АПЕК) во Сан Франциско во ноември.
Американскиот секретар за трговија Џина Раимондо, државниот секретар Ентони Блинкен и секретарката за финансии Џенет Јелен отпатуваа во Кина оваа година за да обезбедат континуирана комуникација меѓу двете земји во услови на тензии што се разгореа откако американската војска собори кинески надзорен балон што патуваше над САД.
Бајден и Шји последен пат се сретнаа во 2022 година на маргините на самитот на Г20 на туристичкиот остров Бали во Индонезија.