САД денес воведоа санкции против четворица највисоки функционери на босанските Срби, вклучително и српската членка на претседателството на земјата, за поткопување на мировниот договор спонзориран од САД со кој заврши војната на балканската земја во 1990-тите.
Жељка Цвијановиќ, заедно со премиерот, министерот за правда и претседателот на парламентот на Република Српска, го олеснија усвојувањето на законот што го поткопува босанскиот Устав, рече портпаролот на американскиот Стејт департмент Метју Милер во соопштението.
Дејтонскиот мировен договор стави крај на босанската војна од 1992 до 1995 година во која беа убиени 100.000 лица, делејќи ја земјата на два автономни региона, Република Српска и Бошњачко-хрватската федерација, поврзани преку слабата централна влада.
Кон крајот на јуни, пратениците во Република Српска гласаа за суспендирање на одлуките на уставниот суд на Босна, гласање иницирано од сепаратистичкиот проруски претседател во регионот Милорад Додик, кој веќе е под санкции на САД и Велика Британија.
Одделот за финансии на САД ги назначи Цвијановиќ, премиерот Радован Вишковиќ, министерот за правда Милош Букејловиќ и претседателот на парламентот Ненад Стевандиќ, за попречување и закана за спроведувањето на Дејтонскиот договор преку обезбедување на усвојување на законот.
„Оваа акција ги загрозува стабилноста, суверенитетот и територијалниот интегритет на Босна и Херцеговина и тешко стекнатиот мир поткрепен со Дејтонскиот мировен договор“, рече потсекретарот на Одделот за финансии за тероризам и финансиско разузнавање Брајан Нелсон.
„Ова однесување дополнително ја загрозува идната траекторија на земјата и успешната интеграција во евроатлантските институции“, додаде Нелсон.
Цвијановиќ минатата година беше ставена под санкции на Велика Британија заедно со Додик за, како што беше опишано, обиди за поткопување на легитимитетот и функционалноста на босанската држава.
Како реакција на санкциите, Стевандиќ рече дека ги гледа како „одлик за доследност, непоколебливост и непопустливост пред уцените и заканите од оние кои се сметаат за моќни“.
Портпаролот на владејачката партија СНСД на Додик рече дека одлуката на САД е „бесрамна и лицемерна“.
„Никакви санкции нема да не спречат да си ја вршиме работата“, рече Радован Ковачевиќ.
Означувањата се надоврзуваат на претходните американски санкции и визни ограничувања дизајнирани да промовираат одговорност на лицата кои ги поткопуваат демократските процеси или институции, соопшти Одделот за финансии на САД.
Додик и неговите сојузници долго време промовираат отцепување на регионот од Босна и негово обединување со соседна Србија.
Тие ги засилија активностите што ги поткопуваат државните институции во последниве месеци, вклучително и суспендирање на одлуките на меѓународниот мировен пратеник.
Извор: Ројтерс