Мобилните единици на руските трупи се обидуваат да заземат украински села на околу 30 километри северно од градот Харков.
Киевските сили ја објавија оваа снимка направена во последните денови во близина на пограничниот град Вовчанск.
Украина истрела проектили од пограничниот регион кон Русија. Москва тврди дека во нападот неодамна на станбена зграда во Белгород загинале седум лица.
Ноачинот на кој тие се поставени и бројот на војници што ги имаат не сугерира дека се обидуваат да го опкружат ХарковПатрик Бари, Аналитичар
„Мислам дека има повеќе причини зошто Русија би пробала нешто овде. Значи очигледно да се создаде тампон зона, но и да се тестира одбраната и да се види што се случува. Но, начинот на кој тие се поставени и бројот на војници што ги имаат, можеби 30-40 илјади кои напаѓаат во мали пешадиски групи, тоа навистина не сугерира дека тие се обидуваат да го опкружат Харков или нешто слично“, вели Патрик Бари, аналитичар од Универзитетот Бат.
Украинскиот претседател Володимир Зеленски отиде во Харков откако ги откажа сите странски патувања.
Киев рече дека неговите одбранбени потези го забавиле напредувањето на Москва.
„Тие во моментот се надминати од руски гранати со околу пет или шест спрема еден“, додава Бари.
Украинските сили сè уште го чекаат најголемиот дел од испораките на оружје во рамките на пакетот помош од САД од 60 милијарди долари, кој конечно беше усвоен минатиот месец, по шестмесечно одложување.
„Помошта на САД е клучна. За жал, паузата во испораката на оружје имаше значително влијание врз ситуацијата на фронтот и тоа е она што го гледаме сега“, вели Серхи Рахманин, од Украинскиот парламентарен комитет за национална безбедност.
Украина вели дека руските авиони и ракети се способни да ги нападнат нивните позиции пред да влезе пешадијата.
Киев постојано бара повеќе системи за противвоздушна одбрана.
Минатиот месец Украина усвои предлог-закон за мобилизација за да се реши недостигот на регрути.
„Мислам дека следните три месеци ќе бидат клучни за Украина. Русите во моментов имаат краток период на можности. Моќта на украинските вооружени сили е намалена и Русите го чувствуваат тоа. Тие собраа доволно ресурси - оружје, муниција, жива сила, и сега се обидуваат да ги искористат максимално нивните резерви. Тие се обидуваат да ги растурат нашите сили низ целата линија на фронтот“, додава Рахманин.
Може ли Украина и нејзините западни сојузници да го свртат правецот на војната?
„Се чини дека шансите да вратат значајна територија, сега, на среден рок се намалуваат. Освен ако не дојде до некаква промена во поддршката од Западот - голем пакет за генерирање сили и долгорочна стратегија за тоа како изгледа успехот. Ниту едно од тоа во моментот не претстои. Мислам дека Украина останува во дефанзива и го држи она што го има“, смета аналитичарот Бари.
Аналитичарите велат дека Русија успеала да ја обнови својата воена сила во изминатите шест месеци со помош на Кина, Иран и Северна Кореја и оти тоа ја отежнува секоја идна украинска офанзива.
Facebook Forum