Ново истражување утврди дека и во мали количини, озонскиот смог го зголемува ризикот за астма, а заедно со другите воздушни загадувачи придонесува за срцеви и мозочни удари.
Лорин Алба е хроничен астматичар речиси 20 години. Според Американското белодробно здружение, таа е една од преку 20-те милиони лица во САД кои страдаат од ова заболување.
„Деновите кога квалитетот на воздух е лош, автобусите, смогот, загадувањето – сето тоа може да ми предзвика напад“, се жали Алба.
Џенис Нолин од Американското белодробно здружение вели дека најновото истражување на Агенцијата за заштита на животната средина- ЕПА и Универзитетот на Северна Каролина се бавело со здрави млади возрасни и нивоата за кои претходно се сметаше дека се безбедни. Кога биле изложени на нив во клинички услови, добиле проблеми со дишењето.
Озонот е составен од три атоми на кислород. Овој невидлив гас може да го иритира и воспали респираторниот систем. Озонот тоа не го прави самиот, туку најчесто во комбинација со честички од дизел-издувни гасови, на пример, што, пак, може да доведе до срцев или мозочен удар
Согласно Актот за чист воздух што е на сила веќе 40 години, населените места имаат обврска да го намалот озонот и другите загадувачи. Но, Американското белодробно здружение коментира дека тоа не е доволно.
„Во последниот извештај проценивме дека 175 милиони Американци живеат во средини што не можат да добијат преодна оценка за чист воздух“, наведува Џенис Нолин.
Во истражувањето на ЕПА како најризични групи се наведуваат децата, постарите лица, белодробните болни, но и оние кои работат или пак вежбаат на отворено.