„12 години роб“ најдобар филм, „Гравитација“ со најмногу Оскари

Историската драма „12 години роб“ доби централно место во бессоната, ѕвездена ноќ во Холивуд: го однесе Оскарот за најдобар филм.

„Клубот на купувачи Далас“ доминираше во категоријата машки улоги: Метју Мекоханеј освои Оскар за главна, а Џаред Лето за споредна машка улога.

Во мошне тесна конкуренција, Кејт Бланшет ја доби златната статуетка за главна женска улога во „Тажната Џесмин“, а Лупита Нјонго за споредна улога во „12 години роб“.

Највеќе Оскари освои „Гравитација“ - седум, меѓу нив и за најдобра режија.

Елен Деџенерис доби исклучително поволни коментари од критиката како водител на спектаклот, втора година по ред, а со „селфито“ на кое е со некои од главните ѕвезди вечерта постави рекорд на Твитер - над 2,7 милиони корисници ја пренесоа нејзината фотографија.

Холивуд не ги оценуваше само најдобрите, туку и најлошите, што ја добија наградата Рази. Најлошо остварување - „Филм 43“, а најлоши актери - таткото Вил Смит и синот Џејден за улогите во „По Земјата“.