„Отворен Балкан“, економската соработка, трговската размена, енергетската стабилност на регионот, потенцијалните ризици за Западен Балкан – ова беа темите за кои денеска во Белград разговараа српските власти и македонската делегација предводена од премиерот Димитар Ковачевски.
„Нема поголема глупост од границите на Балканот. Ние сме биле држави кои меѓу себе единствени немале граници, а сега сме единствени кои меѓу себе имаат граници“, изјави Ковачевски на прес-конференцијата со српската премиерка, зборувајќи за соработката во рамките на „Отворен Балкан“.
Ана Брнабиќ ја повтори поддршката на Белград за Скопје во процесот на евроинтеграции.
„Разговаравме за меѓусебните односи и интеграции. Србија го поддржува поцесот на евроинтеграции на Северна Македонија. При нашите разговори со Брисел зборуваме за тоа што во интерес на Србија, но и за тоа што е во интерес на Северна Македонија и на Албанија. Очекуваме интегрирањето да се движи забрзано што е добро во интерес на регионот. Она што е во интерес на регионот е добро и за Србија“, вели Брнабиќ.
Ковачевски рече дека „Северна Македонија покажа дека не отстапува од стремежите да ги оствари своите стратешки цели како во одржување на добрососедските односи, така и во посветеноста на зачленувањето на земјата во ЕУ. Северна Македонија и Србија припаѓаат на демократскиот и слободен дел од Европа. И како што ние, земјите од Западен Балкан имаме интерес да бидеме членки на ЕУ, така и ЕУ има интерес на Балканот да нема регионални конфликти, да има стабилност, да има економски стабилни држави кои ќе се развиваат и ќе се усовршуваат, на демократски, административен, политички и безбедносен план.“