Испочитувана е обврската за два проценти од буџетот да бидат наменети за одбраната, истакна министерот за одбрана Владо Мисајловски на денешниот редовен предновогодишен брифинг со новинарите во Домот на АРМ.
„Гледано во пари, тој буџет изнесува 329 милиони евра, од кои 32 проценти или 106 милиони евра се за модернизација и за опремување на армијата. Тоа се 18 милиони евра повеќе од минатата година“, истакна Мисајловски на брифингот.
Гледано во пари, тој буџет изнесува 329 милиони евра, од кои 32 проценти или 106 милиони евра се за модернизацијаВладо Мисајловски
Во рамките на модернизацијата, до крајот на идната година се очекува да финализира набавката на воените возила JLTV и „страјкер“ од САД, како и набавка на системите за одбрана „боран“ и „мистрал“.
„Фактот е дека со модернизацијата во армијата инвестираме значителни средства и дека со секој изминат ден ден се зголемува и борбената готовност“, истакна Мисајловски.
Во однос на колективните договори за армијата Мисајловски рече дека по таа основа се исплатени 14 милиони евра за армиските припадници, или 99 отсто од предвидениот број трансакции.
Нема враќање на задолжителниот воен рок
„Имало огромни тужби поради неисплатени обврски кон вработените, околу 6 милиони евра. Тоа го надминуваме“, рече Мисајловски.
Воедно министерот рече дека не се планира враќање на задолжителниот воен рок во армијата, но најави и прием на 300 нови професионални војници догодина.
„Со тој начин зголемуваме припадници во армијата и ја зголемуваме борбената готовност“, рече Мисајловски, при што најави прилив и до 60 граѓани со цивилни факултети, како и завршување на постапката за прием на дипломци и дополнителни вработувања.
Засега нема нови пакети помош за Украина
Мој приоритет ќе биде целосна модернизација на македонската армијаВладо Мисајловски, министер за одбрана
Во однос на помошта за Украина, рече дека е во фаза на завршување на постапката за пакет воена помош, веќе одобрен на затворена седница на Владата.
„За нови пакети во овој момент не се разговара, но ќе ги разгледаме сите опции. Доколку некаде можеме да помогнеме, ќе помагаме. Мој приоритет ќе биде целосна модернизација на нашата, македонска армија“, рече Мисајловски.
На брифингот стана збор и за набавката на осумте армиски хеликоптери од италијанскиот произведувач „Ломбарди“, која чини околу 250 милиони евра. Притоа Мисајловски рече дека се соочуваат со правни проблеми.
Техничкиот аранжман за набавката на хеликоптерите не е заверен во МО?
„За жал, техничкиот аранжман што е потпишан меѓу министрите не е заверен во министерството. Тоа е проблем за кој мораме да најдеме начин правно да го затвориме“, рече Мисајловски и додаде дека се изведуваат детални внатрешни проверки за целиот договор.
Сепак, поранешната министерка за одбрана, Славјанка Петровска, во изјава за Гласот на Америка, рече дека сè било изведено според процедурите.
„Верувам дека тимот и комисијата за набавки, која е независна од министерот, постапила согласно законските прописи и процедури и дека апсолутно, договорот што е склучен и сите останати документи се правно валидни и се обврзувачки“, рече Петровска.
Петровска додава: „Не го гледам тоа како проблем, доколку такво нешто е констатирано. Тоа е макотрпен процес, три години спроведуван од експерти во министерството и армијата“.
За набавката на хеликоптерите, како што рече Мисајловски, веќе бил уплатен аванс од 39 милиони евра, а следи уплатата и на уште 35 милиони евра.
Во јануари идната година треба да се одржи средба со италијанскиот производител, а првиот хеликоптер треба да пристигне кон крајот на 2026 година.
