Бројот на лица кои страдаат од хронична глад ширум светот се намали за прв пат во 15 години и е под една милијарда луѓе.
Организацијата за храна и земјоделство (ФАО) како причини ги наведува подобрените економски услови и намалувањето на цените на храната на светскиот пазар.
Но, организацијата подвлече дека во светот се` уште има 925 милиони луѓе кои се гладни - повеќето од нив во земјите во развој.
Генералниот директор на ФАО Жак Диоф вели дека на секои шест секунди умира по едно дете во светот поради неухранетост и потенцираше дека тој број е „апсолутно неприфатлив“.
Намалувањето на неухранетоста најмногу е концентрирано на Азија, со 80 милиони гладни луѓе помалку годинава. Во областите на Африка под Сахара, намалувањето е најмало – околу 12 милиони луѓе.