И понеделникот навечер продолжија протестите во голем број на градови во САД поради неодамнешните две одвоени одлуки на големите пороти да не бидат покренати обвиненија против полицајци - белци за интервенции во коишто загинаа невооружени лица - црнци.
Демонстрантите во Њујорк ги блокираа улиците пред спортската арена Барклис кадешто се играше натпреварот од НБА меѓу Кливленд кавалирс и Бруклин нетс. Тие ги скандираа последните зборови на Ерик Гарнер: „Не можам да дишам“. Овој 43-годишник почина од задушување во јули годинава во Њујорк, откако полицаецот Даниел Панталео го држеше со рака околу вратот додека со неколку колеги се обидуваше да го совлада на земја и да го уапси.
Во центарот Барклис, суперѕвездата Леброн Џејмс и други играчи на загревањето носеа маица со истите зборови.
Во Беркли, Калифорнија, демонстрантите кусо време го блокираа главниот автопат и железничката станица.
Протестите претходната ноќ во Беркли се претворија во насилни кога демонстрантите започнаа да кршат излози и да ограбуваат продавници, по што полицијата употреби солзавец.