Првиот човек на Меѓународниот монетарен фонд е внимателен оптимист за шансите на светската економија. Кристин Лагард вели - светот ја преживеа европската должничка криза, но глобалните еконoмски изгледи и натаму се на тенки нозе.
Порано годинава, грчката должничка криза не беше мака само за жителите на оваа земја - го окупираше вниманието и на светските берзи. Со, условно кажано, сега малку посмирената ситуација во земјата поради новиот меѓународен пакет помош, директорката на Меѓународниот монетарен фонд (ММФ), Кристин Лагард вака ја оценува ситуацијата: „Има напредок во економската клима. Но, да не се залажуваме, ризикот и натаму е висок, а ситуацијата – кревка“.
За Лагард, еден од најголемите ризици по светската економија е заканата од друга должничка криза, можеби во Шпанија, или Италија. ММФ и Светската банка ќе одржат редовна годишна средба во Вашингтон на 20-ти и 21-ви април. Лагард бара обединет фронт од светските лидери:
„Ризиците и потебите се се` уште големи и би било немудро да се игнорира тој факт“.
Во време кога земјите поединечно се борат со долгови, Лагард потенцира дека на Фондот му требаат дополнителни средства од 187-те земји-членки за да се бори против идните економски кризи. Вели, цената на инфлацијата би можела да биде многу поголема од давањето повеќе пари на Фондот.