Привремената претседателка на Киргистан Роза Отунбајева вели дека до 2.000 лица биле убиени во етничкото насилство во јужниот дел на земјата – 10 пати повеќе од официјалната проценка.
Отунбајева петокот го посети регионот за првпат по судирот меѓу етничките Кигистанци и Узбекистанци што започна на 10-ти јуни во градовите Ош и Џалалабад. Таа изјави дека нејзината влада ќе стори се` што може да го обнови Ош за да се вратат бегалците.
ОН проценуваат дека судирот се одразил на до 1 милион луѓе, од кои 400.000 бегалци кои минале во Узбекистан или пак се групираат во близина на границата со оваа земја.
Американскиот заменик-државен секретар Роберт Блејк разговараше со некои од бегалците при посета на камп и болница на узбекистнската страна на границата. Тој повика на истрага за насилството. „Целосна и транспарентна“ истрага побара и Советот за човекови права на ОН во резолуцијата што ја усвои петокот.