Американската државна секретарка Хилари Клинтон ја реафирмираше политиката на отворени врати на НАТО на средбата со колегите од Македонија, Босна и Херцеговина, Грузија и Црна Гора.
„Можноста за членство во НАТО се покажа дека е моќна мотивација земјите да применат тешки, но неопходни реформи, да разрешат внатрешни разлики, како и разлики со соседите и да придонесат во безбедносните операции од кои имаат корист тие и сите ние. Нашата политика на отворени врати произведе некои од нашите најпосветени и активни сојузници и помогна да се произведе стабилност и соработка во Централна и Источна Европа. И пошироко, онака како што НАТО растеше, Европа стана побезбедна и попросперитетна“, рече Клинтон.
Говорејќи во својство на претставник на земјата - домаќин на Самитот, Клинтон им порача на аспирантите дека Вашингтон ќе продолжи да соработува со нив, билатерално и преку НАТО. “Верувам дека овој самит треба да биде последен што не е за проширување“, нагласи првиот човек на американската дипломатија.
Задржувајќи се конкретно за Македонија, Клинтон ја нарече токму така - Македонија, но побара решение за спорот околу името, како предуслов земјата да влезе во НАТО.
„Македонија придонесе за регионалната и глобална безбедност, меѓу што и значителниот и долготраен придонес во ИСАФ и ги исполни клучните критериуми за членство во НАТО. Цврсто поддржуваме решение на тековниот спор околу името и ги повикуваме страните да постигнат спогодба, така што Македонија ќе може да се приклучи на Алијансата што е можно побргу“, кажа американската државна секретарка.
На поширок план, Клинтон ги охрабри Босна, Македонија и Црна Гора да продолжат да остваруваат регионални иницијативи, како заедничкиот пристап кон воздушната одбрана, подготвеноста за природни катастрофи и заедничкото распоредување во ИСАФ.
Државната секретарка им порача на аспирантите да не губат надеж на патот до НАТО и им вети помош, бидејќи, како што рече, тоа е во наш интерес. „Знаеме дека процесот може да биде долг и со предизвици, но треба да останеме на него, и да не ја заборавиме нашата крајна цел: посилен, потраен и поефикасен НАТО“, кажа Клинтон, заклучувајќи: “дозволете ни тука во Чикаго да ја реафирмираме нашата заложба кон проширувањето - направено како што треба - како суштински елемент на нашата цел и нашето заедништво“.