Македонците во јужна Флорида гравитираат околу црквата Св.Димитрија во Вест Палм, која важи за нивен духовен дом и катче за дружење. Велат дека меѓу нив нема разединетост и сложно живеат и со другите етнички групи, претежно јужноамерикански, кои се населени во овој дел на САД.
Скопјанецот Драган Пациновски е потпретседател на македонската црковна заедница во општината Вест Палм во сојузната држава Флорида. Во САД живее веќе 13 години и еден од најангажираните во заедницата
„Во 1987-ма се првите корени кога се донела одлука да се гради црква. Тогаш е регистрирана како црква, но само на хартија“, вели Пациновски.
Црквата била завршена пред неколку години. За празниците, атмосферата е иста како во црквите во татковината. Најмасовно е на Велигден. Во чест на патронот Св. Димитрија, секоја година се организираат народни забави до раните утрински часови. Црквата се` уште не осветена, но за сите големи празници доаѓаат свештеници од други епархии, најчесто од Канада.
Таа е обединувачки фактор, вели Прциновски: „Политиката е едно, меѓутоа јас сум убеден, дека ниту една амбасада, ниту конзулат не може да го обедини нашиот народ во туѓина како што може Црквата во САД, Австралија и Канада“.
Лена Гоговска во текот на работната недела е медицинска сестра во Вест Палм, а за викендите е секретар на Црквата.
„Македонците во јужна Флорида секоја недела се собираат. Ова е нивен дом. Сите Македонци се збираат в недела, се дели ручек, сите жени готват домашни јадења. Македонците се собираат за сите поголеми православни празници“, вели Гоговска.
Една годишно, во првата недела од март, црквата организира и традиционален излет со иселеници од други делови од САД, Канада и Австралија.