Најмалку 160 лица загинале во големо невреме со торнада што синоќа ја погоди Алабама, соопштија властите на оваа сојузна држава, а се одрази и на поширокиот југоисточен дел на САД.
Невремето сега се движи низ Вирџинија, Западна Вирџинија и Мериленд, каде метеоролозите објавија опасност од торнада. Тоа истури обилен дожд, град со големина на топче за голф, рушеше дрвја врз домови и креваше тешки предмети во воздухот како да се играчки. Стотици илјади лица се без електрична енергија.
Најтешко погоден е градот Тускалуза во Алабама, каде, според градоначалникот Волтер Мадокс, „биле збришани цели квартови“. Торнада имало и во градот Бирмингем.
Гувернерот на Алабама Роберт Бентли ги предупреди жителите дека е можно ново невреме.
Претседателот Барак Обама објави вонредна состојба за Алабама на федерално ниво, со што овозможи помош од федералната влада и изрази сочувство до семејствата на загинатите.
Претходно месецов, во невремето што го погоди јужниот дел на САД, загинаа 45 лица.