Американската икона за човекови права Дороти Хајт почина во Вашингтон на 98-годишна возраст.
Таа беше 40 години претседател на националниот Совет на жени-Афроамериканки, преземајќи ја функцијата во 1957-ма од легендарната активистка Мери МекЛиод Бетан.
Во соопштение, американскиот претседател Барак Обама изјави дека е длабоко ожалостен за нејзината смрт и ја нарече „кума на движењето за граѓански права и хероина на многу Американци“.
Под нејзино водство, организацијата на Хајт беше предводник на американското граѓанско движење во 50-тите и 60-тите. Таа соработувала со бројни лидери за граѓански права и била на сцената до Мартин Лутер Кинг за време на неговиот говор „Имам сон“ на скалите пред споменикот на Линколн во Вашингтон.