Обајцата лидери ќе се сретнат во чешкиот главен град, каде пред една година претседателот Обама ја претстави својата визија за свет без нуклеарно оружје.
„Денес, јасно и со верба ја изложувам американската определба за мир и безбедност во свет без нуклеарно оружје“, изјави тогаш американскиот претседател.
Договорот што ќе биде потпишан во четврток ќе го замени договорот СТАРТ-Еден, што поранешните претседатели на САД и тогашен Советски Сојуз, Џорџ Буш постариот и Михаел Горбачов, го потпишаа во 1991-ва година. Важењето на документот истече минатиот декември.
По едногодишни тешки преговори, Обама и Медведев ќе потпишат договор за намалување на залихите на нуклеарни боеви глави за 25 до 30 проценти.
Пактот е скромен, но важен чекор напред, вели Кингстон Риф од Центарот за контрола и непролиферација на нуклеарното оружје, со седиште во Вашинготн.
„Договорот проверливо ќе ги ограничи вишокот на нуклеарните залихи на САД и Русија, а ќе даде и нов пакет на провизии за верификација, мониторинг и транспарентност“, вели овој експерт.
Тој очекува договорот да помогне да се зајакнат честопати напнатите односи меѓу двете земји. Риф вели дека оваа подобрена соработка се очекува да помогне САД и Русија да се справат со нуклеарниот тероризам и да работат кон воведување на поостри санкции против Иран поради неговите нуклеарни активности.
По потпишувањето, договорот мора да биде ратификуван од руската Дума и американскиот Сенат, каде е потребно да го одобрат 67 од 100 сенатори. За време на кусиот престој во Прага, Обама ќе има и еден-на-еден средба со неговиот руски колега, а планирана е и вечера со шефовите на 11 држави од Централна и Источна Европа.