Американскиот претседател Барак Обама се врати во Вашингтон по кусата, ненајавена посета на Авганистан каде изврши притисок врз авганистанскиот колега Хамид Карзаи да ги интензивира напорите за сузбивање на корупцијата и да го подобри владиниот учинок.
Шестчасовната посета на Кабул започна со разговори во претседателската палата. Обама ги пофали напорите на Карзаи и неговиот кабинет за безбедноста во земјата, но подвлече дека властите треба да се пресметаат со корупцијата и да го прошират владеењето на законите.
Карзаи изрази благодарност за американската поддршка и вети дека неговата земја ќе напредува и на крајот ќе го презеде обезбедувањето во свои раце. Белата куќа најави дека Карзаи ќе го посети Вашингтон на 12-ти мај.
Обама се сретна и со американските офицери и војници во воздухопловната база Баграм северно од Кабул. Тој истакна дека американската мисија во Авганистан е јасна – да се оневозможи, растури, порази и уништи Ал-Каида и нејзините екстремистички сојузници.