Младиот македонски гитарист со диплома од престижниот „Беркли“, Владимир Четкар, настапи во популарниот, светски прочуениот џез-клуб „Блуз ели“. Вели, му се исполнила желбата да биде дел од програмата на реномираниот музички центар.
Владимир Четкар беше придружуван од Мото Фукушима на бас-гитара, Милан Милановиќ на пијано и Арон Стил на тапани. Се претстави со сопствени нумери.
Промовираше дел од последниот албум, во оригинал насловен „We will never end“, но и од новиот, што треба да излезе на крајот од летото, а е фузија од фанк, соул, џез...
Од каде црпи инспирација?
„Секој музичар е интереснба комбинација од сето тоа што го конзумирал и дигестирал во текот на неговата музичка надградба, како и од менталитетот од местото од каде доаѓа“
Иако подолг период живее во САД, а од неодамна во Њујорк, врз Четкар големо влијание во творењето има - Македонија:
“Инспирација ми дава и прекрасниот менталитет во Македонија; топлината на луѓето, како тие на некој начин имаат нешто универзално, космополитско во својата комуникација и светот тоа се` повеќе ќе го осознава“
Четкар е првиот Македонец што настапи во овој славен вашингтонски клуб, што воедно е голем успех и за македонската музика и за нејзината промоција во Америка.
Во долгогодишната историја на клубот „Блуз ели“ имаат настапувано многу славни џез-музичари, меѓу кои Ела Фицџералд, Дизи Гилеспи, Оскар Питерсон, Чарли Мингус, Вејн Шортер, Винтон Марсалис, Грувер Вашингтон...