Шведскиот Меѓународен институт за мировни истражувања алармира дека во моментов се развива се` поголема трка во вооружување во деловите на светот каде владее напнатост.
Организацијата со седиште во Стокхолм во извештајот наведува дека глобалната продажба на оружје пораснала за 22% меѓу 2005-та и 2009-та година, споредено со претходните пет години. Во него се наведува и дека 27% од набавките биле воени авиони.
Институтот е особено загрижен поради фактот што кога богати земји купуваат скапи воени авиони, нивните посиромашни соседи – ривали реагираат, и самите купувајќи оружје. Во извештајот стои и дека трката во вооружување се интензивира во експлозивните области како Блискиот Исток, Северна Африка, Југоисточна Азија и Јужна Америка.
Според документот, САД и натаму се светски најголемиот извезувач на оружје, а Грција била една од петте земји што примиле најповеќе конвенционално оружје и воедно главен муштерија за борбени авиони од американско и француско производство.
Институтот јавува и за драматично зголемување на продажбата на оружје во Јужна Америка и во Југоисточна Азија, особено во Индонезија, Сингапур и Малезија.