Доминантно сината боја ја отсликува победата на СДСМ и коалицијата, наспроти ВМРО-ДПМНЕ. Поразот на доскоро неприкосновената партија е поголем, ако се има во предвид дека во првиот круг социјалдемократите освоија речиси 40 градоначалнички места и тоа во Скопје, Битола, Куманово, Прилеп, Охрид, Велес, Гевгелија, Кратово, Кочани, Дојран, Радовиш, Ресен, како и скопските Центар, Карпош, Ѓорче Петров, Аеродром. Синоќа се славеше пред зградата на владата.
„Им порачувам на советниците и градоначалниците дека ерата на локални шерифи заврши. Обврската сега е поголема. Во Македонија има живот за сите“, истакна премиерот Зоран Заев.
ВМРО-ДПМНЕ, во првиот круг доби градоначалници во Илинден, Петровец, Сопиште. Груевски обвини дека имало бројни нерегуларности, но и дека по изборите ќе се анализира резултатот.
„Како претседател на партијата имам најголема одговорност – за сето тоа, за причините и за идниот правец ќе се дискутира во периодот по изборите“, подвлече претседателот на ВМРО-ДПМНЕ, Никола Груевски.
Втор круг избори за градоначалници, од поголемите места, ќе има во Штип, Тетово, Гостивар, Струга, како и во скопските Кисела Вода, Бутел, Шуто Оризари, Сарај, Чаир, Гази Баба.
Facebook Forum