По дванесетдневен бојкот на наставата - период во којшто ресорниот министер за образование и наука Абдилаќим Адеми не ги прифати нивните барања за разговор - голем дел од 20.000 македонски средношколци коишто учествуваат во бојкотот во училиштата во македонските градови денес излегоа на третиот по ред протестен марш на улиците на Скопје, но и на улиците во Охрид, а поддршка им испратија врсниците од Битола и Струмица.
Средношколците по трети пат маршираа против, како што наведуваат, „лошите реформи во образованието“, барајќи полагање на државна матура според стариот концепт и шестмесечно ставање во мирување на законот за екстерното тестирање. Тие најавија дека бојкотот ќе продолжи се` додека не им се исполнат барањата.
Учениците од сите средни училишта, од сите националности, коишто за маршот добија официјална поддршка од Студентскиот, Наставничкиот и од Професорскиот пленум, овој пат маршираа на релација Градски парк - Влада (каде им се придружија студентите) - Министерство за образование и наука. Поддршка на средношколците им дадоа бројни македонски јавни личности, а на протестите им се придружи и Унијата на студентите Албанци од Македонија којашто апелираше до своите членови да го поддржат протестот. Членови на Студентскиот пленум на средношколците денес им донесоа и факел, како своевиден симбол на заедништвото или братството.
Со транспаренти, меѓу кои беа „Средношколец не е еднакво на бел глушец“, „Министре, од нас ли се плашите?“, „Верувајте им на младите, тие се креатори на иднината“, „Не ни го уништувајте образованието“, со свирчиња, и со слогани како „Заедно сме посилни!“, „Сега ќе не слушнте!“ и „Доста беше молк!“, средношколците мирно протестираа, со организирана редарска служба и следени и од дел од професорите и родителите и од бројни новинарски екипи.
Пред зградата на Министерството за образование и наука, неколкумина средношколци и студенти одржаа инспиративни говори, порачувајќи им на политичарите дека се без визија, дека со погрешните одлуки „ги бркаат од сопствената земја“ и дека мора да научат да го слушнат гласот на „иднината на Македонија“.
До моментот на објавување на овој извештај, од ресорното министерство немаше реакција на протестот.