Утврден е текстот на предлог-законот за амнестија за настаните од 27-ми април.
Собраниското тело за помирување денеска ги усогласи ставоите за нацртот. Детали засега не се откриваат.
Она што се знае е дека ќе нема амнестија за организаторите и извршителите на физичко насилство на денот на упадот во Парламентот, што за малку ќе резултираше со конфликт во Македонија.
„Најдена е првна формулација и направена е дистинкција меѓу лицата кои го организирале настанот и насилниците на 27-ми април. Јасно е наведено за кои делови се однесува амнестијата. Насилство и обид за убиство секако нема да подлежат на законот за амнестија, туку сите оние кои не се организатори и не извршиле физичко насилство“, изјави Зекир Рамчиловиќ, член на Собраниското тело за помирување.
Предлог-законот, според ова тело, нема да влијае врз работата на судовите, што било едно од клучните прашања за кое било постигнато консензус.
Прашањето е дали пратеници кои гласаа за потребата од уставни измени како Крсто Мукоски и Сашо Василевски, а се дел од обвинението за 27-ми април, ќе бидат амнестирани со овој закон?
„Ќе работиме на тоа да донесеме политичка одлука со која мислиме дека ќе се релаксираат односите во државата во однос на 27-ми април. Не би навлегувал во динамиката на судот. И да има друго обвинение, нема да се амнестира некој што е организатор или има докази за физичко насилство. Тоа е тоа“, вели Рамчиловиќ.
Овој закон кој, според најавите, ќе се носи по скратена постапка, и е еден од клучните елементи за обезбедување на неопходното двотретинско мнозинство за правно заокружување на Договорот од Преспа, преку усвојување на уставните измени.
Facebook Forum