Линкови за пристапност

Американска помош за најмладите пациенти


Американска помош за најмладите пациенти
Американска помош за најмладите пациенти

„Ова што го гледате денес го покажува она што може да се направи кога две влади работат заедно. За САД ова е продолжение на напорите кои ги направивме за да ја продолжиме раката на пријателството со Македонија во многу области“, рече во четвртокот, амбасадорот на САД во Македонија, Филип Рикер, за време на претставувањето на современата опрема за Детската клиника во Скопје, што е најнова американска донација.

Американското Министерство за одбрана донираше 350 илјади долари (250.000 за Одделот за интензивна нега и 100.000 долари за реновирање на Клиниката) со што се разубавува и скратува престојот на младите пациенти во оваа установа, во која годишно се третираат меѓу 1.600 и 1.700 пациенти, од кои врз 1.400 се вршат хируршки интервенции. Со реновирањето на Клиниката за детска хирургија, единствена во државата каде се оперираат новороденчиња и мали деца, сега во Одделот за детска хирургија може да се вршат најсложени хируршки зафати. Купени се нови болнички кревети, ѕидовите украсени со ликови од цртаните филмови, а најважно од се` е што од американската донација се купени 40-тина најсовремени апарати. Со сево ова, клиниката ќе им го олесни престојот на малите пациенти од Македонија, ќе им овозможи и посложени интервенции за кои досега нивните родители мораа да ги водат во странство, а ќе може да се третираат и пациенти и од соседните држави.

„Работевме долго време заедно со персоналот на Клиниката да идентификуваме што и` е потребно на детската хируршка клиника. Се` со цел да се овозможи најдобра возможна опрема од респираторни машини до современи инкубатори“, изјави амбасадорот Рикер.

„Имаме Клиника со која ќе се гордее целата држава и верувам ќе бидеме мотив и за другите здравствени институции да продолжат со нашиот ентузијазам за сопствена модернизација“, рече д-р Владимир Чадиковски.

По повод акцијата Ден на дрвото, американскиот амбасадор Рикер и заменик министерот за здравство Поповски, засадија и млади дрвца пред клиниката.

XS
SM
MD
LG