Жителите на Северна и Јужна Америка и поголемиот дел од Источна Азија беа сведоци на комплетно затемнување на месечината, познато како крвава месечина. Бакарно-црвената боја беше резултат на минувањето на Земјата меѓу сонцето и месечината, кусо време пред изгрејсонцето во Америка и малку по изгревањето на месечината во Азија.
Црвената боја се должи на сончевите зраци кои минуваат низ земјината атмосфера, каде се распрснуваат пред да бидат рефлектирани од месечината. Ова е второ од четирите месечеви затемнувања што се случуваат во период од две години. Следните ќе се случат на 4-ти април и 28-ми септември следната година.