Европски претставници повикуваат на истрага за наводите дека косовскиот премиер има врски со организираниот криминал и трговците со човечки органи.
Парламентарното собрание на Советот на Европа денес го прифати извештајот на поранешниот швајцарски обвинител Дик Марти во кој се изложени наводи против Хашим Тачи и други виши лица. Советот бара Косово, Албанија и Мисијата на Европската унија на Косово да преземат мерки во однос на обвиненијата.
Извештајот наведува дека има “бројни индикации“ дека поранешната Ослободителна војска на Косово, со која е поврзан Тачи, убила српски затвореници во специјален притворен центар а потоа ги продала нивните бубрези на црниот пазар.
Тачи упорно ги порекнува обвиненијата. Тој вели дека не крие ништо и обвиненијата ги смета за обид да се поткопа косовското објавување на независност од Србија во 2008-ма.
Понеделникот, извештај во лондонски Гвардијан наведе дека НАТО документи, кои протекле во јавноста, го идентификуваат Тачи како главен водач на организираниот криминал во Косово. НАТО вели дека истражува кој е изворот на протечените информации.