Кина соопшти дека ќе ги укине тарифите за австралиското вино како дополнителен знак за намалување на тензиите меѓу Пекинг и Канбера.
Давачките беа наметнати во 2020 година, како што тензиите меѓу Кина и Австралија се зголемија поради различни геополитички точки.
Кина воведе тарифи од околу 200% за австралиското вино, откако владата на Канбера повика на независна истрага за тоа како започнала пандемијата на ковид-19.
Веќе постоеја билатерални тензии меѓу Австралија и Кина за различни геополитички прашања, вклучувајќи ги човековите права и демократијата во Хонгконг, како и амбициите на Пекинг во Јужното Кинеско Море и Пацификот.
Но, барањето на Канбера во 2020 година за истрага за потеклото на ковид-19 беше пресвртна точка.
Забелешките на поранешниот премиер Скот Морисон ја налутија Кина, која ги сметаше за критика за нејзиното справување со пандемијата.
Подоцна беа наметнати огромни давачки за австралиските производи, вклучително и виното, принудувајќи ги одгледувачите да бараат нови пазари.
Кинеските власти соопштија дека Австралија е виновна за антиконкурентно однесување, но аналитичарите велат дека кинеските економски мерки биле наменети како казна.
Ричард Долан, косопственик на Bec Hardy Wines во Мекларен Вејл во Јужна Австралија, за Гласот на Америка, изјави дека крајот на тарифите е добредојден чекор.
„Прекрасна вест излезе од Кина од Министерството за трговија со која се потврдува отстранувањето на тарифите за австралиското вино за навистина да се дозволи винската индустрија и овде и во Кина да се врати во бизнисот“, рече Долан.
Тој се надева дека австралиската винска индустрија може да ја обнови трговијата со Кина.
„Се разбира, има уште предизвици што треба да се надминат. Ние сме убедени дека, секако, од нашите дистрибутери, почнуваме да добиваме некои добри нивоа на ангажман, а разговорите веќе почнуваат. Нови нарачки за пополнување на магацините кои се исцрпени во последните четири години додека важеа тарифите“.
Лабуристичката влада на Австралија - избрана во мај 2022 година - има помалку конфронтирачки пристап кон Кина од претходната конзервативна администрација во Канбера.
Царините за други австралиски стоки, вклучително и јачменот, се укинати. Остануваат ограничувањата за извозот на јастог и говедско месо во Кина, но премиерот Ентони Албанес рече дека е оптимист оти односите со Кина продолжуваат да се стабилизираат.
Кина е убедливо најголемиот трговски партнер на Австралија.