Севернокорејскиот лидер Ким Џонг Ун денес се сретна со рускиот министер за одбрана Сергеј Шојгу.
Шојгу беше во ретка посета на изолираната земја за време на која двете страни ветија дека ќе ги зајакнат врските, објави државниот медиум КЦНА.
Шојгу му предал на Ким писмо од рускиот претседател Владимир Путин, се вели во извештајот.
Ким за возврат му се заблагодари на Путин за испраќањето воена делегација предводена од Шојгу, додавајќи дека средбата ги продлабочила стратешките и традиционални односи меѓу Северна Кореја и Русија.
Руската и кинеската делегација, вклучувајќи го и членот на Политбирото на кинеската Комунистичка партија, Ли Хонгџонг, пристигнаа во Северна Кореја оваа недела на 70-годишнината од крајот на Корејската војна, прославена во Северна Кореја како „Ден на победата“.
Групите се првите такви истакнати јавни посетители на Северна Кореја од почетокот на пандемијата.
Шојгу ја пофали севернокорејската војска како „најмоќна“ во светот. Шојгу ги даде забелешките за време на средбата со својот севернокорејски колега Канг Сун Нам, се вели во извештајот.
Извор: Ројтерс