Израелските трупи и тенкови влегоа во северниот дел на Газа во понеделникот, проширувајќи го своето воено присуство подлабоко во енклавата.
Асошиетед прес објави дека добил видео од израелски тенк и булдожер што го блокираат главниот автопат север-југ во Газа, кој Израел им рекол на Палестинците да го користат за да избегаат од израелската копнена офанзива.
Израелските воздухопловни сили соопштија дека погодиле над 600 цели на Хамас во Газа во период од 24 часа.
Израел соопшти дека нападнал цели и во Сирија и Либан. Нападите, соопшти израелската војска во понеделникот, биле одговор на нападите започнати од двете земји.
Израелските одбранбени сили рекоа: „За време на судирите со терористите во Појасот Газа, војниците на израелската армија убија десетици терористи кои се забарикадираа во згради и тунели и се обидоа да ги нападнат војниците“.
Хамас, исто така, објави тешки борби во северозападниот дел на Газа.
Во соопштението на „Спасете ги децата“ се вели дека бројот на пријавени деца убиени во Газа за три недели „го надмина годишниот број на деца убиени низ конфликтните зони во светот од 2019 година“. Повеќе од 3.000 деца се убиени во конфликтот меѓу Израел и Газа.
Израел објави слики од своите тенкови на западниот брег на палестинската енклава 48 часа откако наредил проширени копнени упади преку неговата источна граница. Хамас рече дека ги погодил израелските тенкови во северна Газа со проектили и се потсмеа на извештаите дека израелските трупи напредувале длабоко во Газа. Ниту еден извештај не можеше да биде независно потврден.
Израелската војска повторно во неделата упати итен повик до палестинските цивили во Појасот Газа привремено да се евакуираат кон југ, подалеку од епицентарот на војната против Хамас.
„Преместувањето на југ е за нивна лична безбедност“, рече во неделата главниот портпарол, контраадмиралот Даниел Хагари.
„Денеска нагласуваме дека ова е итен повик“, рече тој на телевизискиот брифинг.
Тој, исто така, објави дека бројот на луѓе за кои е потврдено дека се држат како заложници во Газа од прекуграничниот напад на Хамас на 7 октомври во јужен Израел сега изнесува 239.
Израел, исто така, објави дека неговите копнени сили убиле неколку милитанти на Хамас додека излегувале од тунел во близина на преминот Ерез, единствениот пешачки премин од Газа во Израел, пред да биде уништен во неодамнешните борби.
Хамас има широка мрежа од тунели под Газа каде што се верува дека складира оружје, храна и други резерви.
Израел му објави војна на Хамас откако милитантната група изврши терористички напад на 7 октомври во кој загинаа 1.400 луѓе, главно цивили, а зедоа повеќе од 200 заложници. Оттогаш, бројот на палестински загинати надмина 8.000, соопшти Министерството за здравство во Газа, управувана од Хамас.
Судирите на границата меѓу Израел и Либан ескалираа во неделата кога Хезболах соопшти дека соборил израелско беспилотно летало над јужен Либан со проектил земја-воздух.
Беспилотното летало беше погодено во близина на Киам, на околу 5 километри од границата со Израел, и беше забележано како паѓа на израелска територија, додаде Хезболах. Два безбедносни извори во Либан изјавија дека тоа е прв пат Хезболах да објави соборување на израелско беспилотно летало.
Израелското Министерство за одбрана не одговори на барањата за коментар. Хамас и Хезболах се странски терористички организации назначени од САД.
Цивили, хуманитарна помош
Претседателот Џо Бајден разговараше во неделата со израелскиот премиер Бенјамин Нетанјаху и го потврди правото на Израел да ги брани своите граѓани од тероризам. Но, тој исто така ја нагласи потребата да се даде приоритет на заштитата на цивилите.
Двајцата разговараа за напорите за заштита на заложниците кои Хамас ги заплени на 7 октомври, а Бајден ја нагласи „потребата веднаш и значително да се зголеми протокот на хуманитарна помош за да се задоволат потребите на цивилите во Газа“, бидејќи резервите таму се намалуваат, соопшти Белата куќа.
Бајден разговараше и со претседателот Абдел-Фатах ел-Сиси за да му се заблагодари за улогата на Египет во доставувањето хуманитарна помош за цивилите во Газа. Тие се согласија да го забрзаат протокот на помош, како и потребата да се заштитат животите на цивилите и Палестинците да не бидат раселени во Египет или на друго место.
Двајцата се согласија да работат заедно за да ги постават условите за траен и одржлив мир на Блискиот Исток, вклучувајќи и формирање на палестинска држава, објави Белата куќа.
Интернет и испорака на помош
Интернетот и телефонското поврзување беа обновени за многу луѓе во неделата, откако бомбардирањето викендов ги уништи повеќето комуникации на територијата доцна во петокот, во голема мера отсекувајќи ги 2,3 милиони луѓе на опколената енклава од светот.
Речиси триесетина камиони со помош влегоа во Газа во неделата, што е најголемиот хуманитарен конвој од почетокот на војната меѓу Израел и Хамас.
Израел ќе дозволи поголема помош во Газа во наредните денови, изјави полковникот Елад Горен од Когат, агенцијата на израелското Министерство за одбрана која координира со Палестинците.
Некои информации за овој извештај дојдоа од Асошиетед прес, Ројтерс и агенцијата Франс прес