Сојузниците на САД во светот го поздравија убиството на Абу Бакр ал-Багдади, нарекувајќи ја акцијата голем удар за Исламската држава, но, нагласуваат дека ИСИС се` уште претставува терористичка закана.
Францускиот претседател Емануел Макрон на Твитер напиша дека смртта на ал-Багдади е само една фаза.
„Со нашите партнери во меѓународната коалиција, борбата продолжува за да се порази оваа терористичка организација. Тоа е наш приоритет на Блискиот исток“, напиша тој.
Турскиот претседател Реџеп Таип Ердоган рече дека убиството на лидерот на Исламската држава е пресвртница во заедничката борба против тероризмот, нагласувајќи дека е убеден оти ќе се постигне мир во светот.
Израелскиот премиер Бенјамин Нетанјаху, му честита на Трамп за, како што рече тој, убиството на ал-Багдади.
„Ова достигнување е важен пробив, но, кампањата е пред нас“, изјави Нетанјаху.
Иран, пак, рече дека убиството на лидерот на Исламската држва не е голема работа, и оти САД едноставно го елиминирале суштеството што сами го создале.
Лидерот на сенатското мнозинство Мич Меконел, рече дека ова е победа за САД и нивните партнери, и оти светот сега е побезбедно место.
Спикерката на Претставничкиот дом Ненси Пелоси изјави дека убиството на ал-Багдади е значајно, но, додаде дека Исламската држва и натаму постои, и оти не смее да се дозволи да ја обнови заканата кон САД.
Кремљ, пак, рече дека нема кредибилна информација за спроведената акција.
Facebook Forum