Иран ги изложи своите беспилотни летала со долг дострел „Мохаџер-10“ на изложба за одбрана во Русија, објави во понеделникот официјалната новинска агенција на Иран (ИРНА).
Американските власти го обвинија Иран дека испраќа беспилотни летала во Русија, вклучително и претходникот на „Мохаџер-10“, „Мохаџер-6“, кој Москва го користеше при инвазијата врз Украина. Техеран негира.
ИРНА информира дека понапредниот систем бил изложен на Меѓународниот воено-технички форум „Армија 2024“, настан што се одржува од понеделник до среда во Патриот паркот надвор од главниот град на Русија.
Ова доаѓа во моменти кога Блискиот Исток се подготвува на заканата од Иран против Израел по убиството на шефот на Хамас Исмаил Ханије во Техеран на 31 јули.
Иран објави детали за системот „Мохаџер-10“ во август минатата година, велејќи дека има зголемено времетраење на опсегот на летот и може да носи поголем товар.
На видео на кое е прикажан дронот заедно со друг воен хардвер, пишува „подгответе ги вашите засолништа“ на хебрејски и на персиски јазик.
Според извештаите на иранските медиуми, дронот има оперативен домет од 2 000 километри и може да лета до 24 часа. Неговата носивост може да достигне 300 килограми, двојно повеќе од капацитетот на „Мохаџер-6“, пишуваат медиумите.