Ураганот Флоренс стигна во Северна Каролина со ветрови од 109 километри на час

Ураганот Флоренс стигна во Северна Каролина. Јачината на ураганот се намали, односно стана бура од прва категорија, но, метеоролозите велат дека се`уште има можност да предизвика смртоносни последици.

Ураганот го погоди брегот на Северна и Јужна Каролина рано утринава, проследен со силни ветрови и дожд.

Националниот центар за урагани соопшти дека Флоренс веќе донел опасен бран вода на крајбрежјето на Северна Каролина.

„Со надоаѓање на брановите, нивото на реките ќе се зголеми и водата ќе се излее, бидејќи ќе нема каде да оди“, изјави гувернерот на Северна Каролина Рој Купер.

Бавното движење на бурата е повеќе загрижувачко, отколку нејзината сила, стравуваат метеоролозите и властите.

Претседателот на САД Доналд Трамп вели дека Владата е подготвена да се справи со последиците од ураганот Флоренс, додека итните служби и единици за помош при катастрофи се подготвени да реагираат.

Утре се предвидува дека ураганот значително ќе ослабне при влегување во централниот дел на Јужна Каролина, а следната недела се очекуваат обилни врнежи од дожд.